(॥పల్లవి॥)
తల లేదు తోఁక లేదు దైవమా నీ మాయలకు
తెలిసియుఁ దెలియక తిరిగేము నేము
(॥తల॥)
తను వేఁటిదో యీ తలపోఁత లేఁటివో
యెనయు సంసార సుఖ మిది యేఁటిదో
వెనక ముం దేఁటిదో వివేక మెరఁగక
దినదినమును నేమో తిరిగేము నేము
(॥తల॥)
పుట్టు గిది యెక్కడో పోయేటి దెక్కడో
ఇట్టె యీ సిరులెల్లా నెక్కడెక్కడో
మట్టులేని హరి నిర్మాణ చక్రములోన
దిట్టలమై యేమేమో తిరిగేము నేము
(॥తల॥)
నేరు పేదో నేర మేదో నిలిచిన దొకటేదో
వూరకే నీ దాసులమై వున్నారము
చేరి నన్నేలినయిట్టె శ్రీవేంకటేశ్వర
గారవించి కరుణించి కావఁగదవే
(||pallavi||)
tala ledu tom̐ka ledu daivamā nī māyalagu
tĕlisiyum̐ dĕliyaga tirigemu nemu
(||tala||)
tanu vem̐ṭido yī talabom̐ta lem̐ṭivo
yĕnayu saṁsāra sukha midi yem̐ṭido
vĕnaga muṁ dem̐ṭido vivega mĕram̐gaga
dinadinamunu nemo tirigemu nemu
(||tala||)
puṭṭu gidi yĕkkaḍo poyeḍi dĕkkaḍo
iṭṭĕ yī sirulĕllā nĕkkaḍĕkkaḍo
maṭṭuleni hari nirmāṇa sakramulona
diṭṭalamai yememo tirigemu nemu
(||tala||)
neru pedo nera medo nilisina dŏgaḍedo
vūrage nī dāsulamai vunnāramu
seri nannelinayiṭṭĕ śhrīveṁkaḍeśhvara
gāraviṁchi karuṇiṁchi kāvam̐gadave